ღონისძიებაში ევროკავშირისა და 22 ქვეყნის წარმომადგენლებმა მიიღეს მონაწილეობა, მათ შორის იყო საქართველოს ენერგეტიკის მინისტრი ალექსანდრე ხეთაგური.

აზერბაიჯანის ენერგეტიკისა და მრეწველობის მინისტრმა ნატიკ ალიევმა კონფერენციაზე აღნიშნა, რომ აზერბაიჯანი მხარს უჭერს ახალი პროექტების განხორციელებას ენერგეტიკის სექტორში, მათ შორის ოდესა-ბროდის ნავთობსადენსა და ტრანსადრიატიკულ პროექტს.

პრეზიდენტების მონაწილეობით რიგით მე-4 ენერგოსამიტი კი, ბაქოში დღეს გაიხსნა.

აზერბაიჯანმა დიდი ძალისხმევა აჩვენა ევროპის ენერგეტიკული უსაფრთხოების საკითხში, - განაცხადა საქართველოს პრეზიდენტმა მიხეილ სააკაშვილმა ბაქოში მიმდინარე ენერგეტიკულ სამიტზე.

მისი თქმით, აზერბაიჯანის მიერ მიღწეული წარმატებები ყველასთვის სამაგალითოა.

რუსულ ოკუპაციაზე საუბრისას, სააკაშვილმა აღნიშნა, რომ მოხდა ზიანის მიყენება ხიდებისთვის, სარკინიგზო მაგისტრალებისთვის და პორტებისთვის.

“ჩვენ არ ვართ რუსეთთან თანამშრომლობის წინააღმდეგი, უბრალოდ მნიშვნელოვანია ალტერნატიული ენერგეტიკული პროექტების მომზადება და რეალიზება”, - აღნიშნა სააკაშვილმა.

საქართველოს პრეზიდენტი თვლის, რომ ევროკავშირთან თანამშრომლობა ენერგეტიკულ სფეროში უნდა გაგრძელდეს.

შეგახსენებთ, სამიტში საქართველოს პრეზიდენტის გარდა, აზერბაიჯანის, თურქეთის, უკრაინის, ლიტვის, პოლონეთის პრეზიდენტები მონაწილეობენ.

“ინტერპრესნიუსი“